സിനിമാ രംഗത്ത് വീണ്ടും സജീവമാവുകയാണ് മീര ജാസ്മിൻ. ക്യൂൻ എലിസബത്ത് എന്ന സിനിമയിലൂടെ തിരിച്ച് വരവിൽ ശക്തമായ സാന്നിധ്യം അറിയിക്കാനുള്ള ഒരുക്കത്തിലാണ് മീറായിപ്പോൾ. മഞ്ജു വാര്യർക്ക് ശേഷം വന്ന നായികമാരിൽ മലയാളത്തിൽ വലിയ ജനപ്രീതി നേടാൻ കഴിഞ്ഞ താരമാണ് മീര ജാസ്മിൻ. നിരവധി സിനിമകളിൽ മികച്ച കഥാപാത്രങ്ങൾ മീര ജാസ്മിന് ലഭിച്ചു. സൂത്രധാരൻ എന്ന സിനിമയിലൂടെ അഭിനയ രംഗത്തേക്ക് കടന്ന് വന്ന മീര ജാസ്മിന് പിന്നീട് കൈ നിറയെ അവസരങ്ങൾ ആണ് ലഭിച്ചത്.അച്ചുവിന്റെ അമ്മ, രസതന്ത്രം, ഗ്രാമഫോൺ തുടങ്ങിയ സിനിമകളിൽ അവിസ്മരണീയ പ്രകടനം മീര കാഴ്ചവെച്ചു. തമിഴിലും തെലുങ്കിലും മീരയ്ക്ക് ശ്രദ്ധിക്കപ്പെടാൻ കഴിഞ്ഞു. സണ്ടക്കോഴി, റൺ, ആയുധം എഴുത്ത് തുടങ്ങിയ സിനിമകളാണ് തമിഴിൽ മീരയെ ജനപ്രിയയാക്കിയത്. സണ്ടക്കോഴിയിൽ മീര ജാസ്മിനെ നായികയാക്കിയതിനെക്കുറിച്ച് സംസാരിക്കുകയാണ് സംവിധായകൻ എൻ ലിംഗുസ്വമി . സണ്ടക്കോഴിക്ക് മുമ്പ് ലിംഗുസ്വമിയുടെ റൺ എന്ന സിനിമയിലും മീരയായിരുന്നു നായിക. മീര തന്നോട് ചോദിച്ച് വാങ്ങിയ കഥാപാത്രമാണ് സണ്ടക്കോഴിയിലേതെന്ന് എൻ ലിംഗുസ്വാമി പറയുന്നു. സിനിമ റിലീസ് ചെയ്ത് 18 വർഷം പൂർത്തായിരിക്കെയാണ് പഴയ ഓർമകൾ ഇദ്ദേഹം പങ്കുവെച്ചത്. സണ്ടക്കോഴിയുടെ വിജയത്തെക്കുറിച്ച് പറയുമ്പോൾ മാര ജാസ്മിനെക്കുറിച്ച് പരാമർശിക്കാതിരിക്കാൻ പറ്റില്ലെന്ന് ലിംഗുസ്വാമി വ്യക്തമാക്കി. അത്രയും നല്ല പെർഫോമൻസ് ആയിരുന്നു മീരാജാസ്മിന്റെത് എന്നും ലിങ്കു സ്വാമി പറഞ്ഞു
അവരാകും അടുത്ത സാവിത്രിയെന്ന് താൻ കരുതി. മീര അത്രയും തീവ്രമായി ഉൾക്കൊണ്ട് അഭിനയിക്കുമെന്നും സംവിധായകൻ ചൂണ്ടിക്കാട്ടി. യഥാർത്ഥത്തിൽ മീരയെ അല്ല നായികയായി മനസിൽ കണ്ടത് എന്നും ഏതെങ്കിലുമൊരു പുതുമുഖ നായികയെ കൊണ്ടുവരണം എന്നായിരുന്നു എന്നും ലിംഗുസ്വാമി പറയുന്നു. നായികയെ തേടിക്കൊണ്ടിരിക്കുമ്പോൾ ഒരു ദിവസം മീര ജാസ്മിൻ ഓഫീസിൽ വന്നു. കഥ പറഞ്ഞപ്പോൾ മീര ജാസ്മിൻ കരഞ്ഞു. എന്തുകൊണ്ട് ഈ വേഷം തനിക്ക് ചെയ്ത് കൂടെന്ന് ചോദിച്ചു. നിങ്ങളോടൊപ്പം ഒരു സിനിമയിൽ വർക്ക് ച്യ്തില്ലെ അതിന് ഒരു മാറ്റമാകട്ടെയെന്ന് കരുതിയെന്ന് താൻ മറുപടി നൽകി. ഇല്ല, ഈ കഥ തനിക്ക് വളരെ ഇഷ്ടമായെന്ന് മീര പറഞ്ഞു. ഇതോടെ വിശാലുമായും മറ്റും സംസാരിച്ച് മീര ജാസ്മിനെ നായികയായി തീരുമാനിക്കുകയായിരുന്നെന്നും ലിംഗുസ്വാമി വ്യക്തമാക്കി. ഇന്ന് നോക്കുമ്പോൾ അവർക്ക് പകരം മറ്റൊരാളെ ചിന്തിക്കാൻ പറ്റില്ല. ഇപ്പോഴും ഫോണിൽ സംസാരിക്കും. ചെന്നെെയിൽ വന്നാൽ ഫോൺ ചെയ്യാതിരിക്കില്ല.
ആരെങ്കിലും റൺ, സണ്ടക്കോഴി എന്നീ സിനിമകളെക്കുറിച്ച് മീരയോട് പറഞ്ഞാൽ തന്നെ വിളിച്ച് സംസാരിക്കുമെന്നും ലിംഗുസ്വാമി വ്യക്തമാക്കി. തമിഴ് സിനിമയിൽ നിന്നും ഏറെക്കാലം മാറി നിന്ന മീര ജാസ്മിൻ റിലീസ് ചെയ്യാനുള്ള ടെസ്റ്റ് എന്ന നയൻതാര ചിത്രത്തിൽ ഒരു പ്രധാന വേഷം ചെയ്യുന്നുണ്ട്. അഭിനയ രംഗത്ത് നിന്നും ഏറെക്കാലം വിട്ടു നിന്ന മീര ഇന്ന് ദുബായിലാണ് താമസിക്കുന്നത്. ക്യൂൻ എലിബസത്തിന്റെ പ്രൊമോഷന്റെ ഭാഗമായി കേരളത്തിൽ മീര കഴിഞ്ഞ ദിവസം എത്തിയിരുന്നു. മീര വീണ്ടും മലയാളത്തിൽ സജീവമാകണമെന്നാണ് ആരാധകരുടെ ആഗ്രഹം. എന്നാൽ തിരക്ക് പിടിച്ച് സിനിമകൾ ചെയ്യാൻ താൽപര്യമില്ലെന്ന് താരം കഴിഞ്ഞ ദിവസം വ്യക്തമാക്കുകയുണ്ടായി. അഭിനയ രംഗത്ത് നിന്നും മീര മാറി നിന്നതിനെക്കുറിച്ച് പല ഗോസിപ്പുകളും വന്നിരുന്നു. അതേസമയം വ്യക്തിപരമായ സന്തോഷങ്ങൾക്ക് വേണ്ടിയാണ് മാറി നിന്നതെന്ന് നടി വ്യക്തമാക്കിയിട്ടുണ്ട്.
