ഇന്ത്യന്‍ ക്രിക്കറ്റ് താരം കെ.എല്‍.രാഹുലും ബോളിവുഡ് നടി അതിയ ഷെട്ടിയും തമ്മിലാണ് ഉടന്‍ വിവാഹിതരാകുന്നത്. നടന്‍ സുനില്‍ ഷെട്ടിയുടെ മകളാണ് അതിയ ഷെട്ടി.പ്രണയത്തെക്കുറിച്ച് ചോദിക്കുമ്പോഴൊക്കെ ഒഴിഞ്ഞുമാറിയിരുന്ന ഇരുവരും പക്ഷെ, ചിത്രങ്ങള്‍ക്ക് പിശുക്കു കാട്ടിയിരുന്നില്ല. അടുത്തിടെ ഒരു സ്‌പോര്‍ട്‌സ് ബ്രാന്‍ഡിനു വേണ്ടിയുള്ള പരിപാടിയില്‍ ഇരുവരും ഒന്നിച്ചെത്തിയിരുന്നു. കഴിഞ്ഞ ഏപ്രില്‍ 18-ന് രാഹുലിന്റെ പിറന്നാള്‍ ദിനത്തില്‍ ഇരുവരുമൊന്നിച്ച് നടത്തിയ യാത്രയിലെ ചിത്രങ്ങളാണ് ആശംസകള്‍ നേര്‍ന്നുകൊണ്ട് അതിയ ഷെട്ടി ഇന്‍സ്റ്റഗ്രാമില്‍ പോസ്റ്റ് ചെയ്തത്.എന്നാൽ ഉടൻ തന്നെ ഇരുവരുടെയും വിവാഹം നടക്കുമെന്നു തന്നെയാണ് ബോളിവുഡ് മാധ്യമങ്ങള്‍ റിപ്പോര്‍ട്ട് ചെയ്യുന്നത്. വിവാഹക്കാര്യം സംബന്ധിച്ച് അതിയയുടെയും രാഹുലിന്റെയും വീട്ടുകാര്‍ തമ്മില്‍ ധാരണയായിട്ടുണ്ടെന്നാണ് പറയുന്നത്.
ഇന്ത്യന്‍ ക്രിക്കറ്റ് ടീമിന്റെ വൈസ് ക്യാപ്റ്റനും ഐ.പി.എല്ലില്‍ ലക്‌നൗ സൂപ്പര്‍ ജയന്റ്‌സിന്റെ ക്യാപ്റ്റനുമാണ് കെ.എല്‍.രാഹുല്‍. സുനില്‍ ഷെട്ടിയുടെ കുടുംബവുമായുള്ള ബന്ധത്തെ താന്‍ ഏറെ വിലമതിക്കുന്നുവെന്ന് രാഹുല്‍ പറഞ്ഞിട്ടുണ്ട്. ക്രിക്കറ്റിനെക്കുറിച്ച് നല്ല ധാരണയുള്ള വ്യക്തിയാണ് സുനില്‍ ഷെട്ടി. ക്രിക്കറ്റിനെക്കുറിച്ചുള്ള സംസാരവേളയില്‍ ഇരുവരും തമ്മില്‍ സംഭാഷണങ്ങളും തര്‍ക്കങ്ങളും പതിവാണെന്നും വിവേകത്തോടെ സംസാരിക്കുന്ന അദ്ദേഹത്തെ താന്‍ ഏറെ ബഹുമാനിക്കുന്നതായും രാഹുല്‍ പറയുന്നു.സുനില്‍ ഷെട്ടിയും കെ.എല്‍.രാഹുലും കര്‍ണ്ണാടക സ്വദേശികളായതിനാല്‍ത്തന്നെ വിവാഹം സൗത്ത് ഇന്ത്യന്‍ രീതിയിലായിരിക്കുമെന്നാണ് നിഗമനം. വിവാഹത്തിനായുള്ള തയ്യാറെടുപ്പുകള്‍ ഇരുവീട്ടുകാരും തുടങ്ങിയതായാണ് റിപ്പോര്‍ട്ടുകള്‍. വിക്കി കൗശാല്‍-കത്രീന കൈഫ്, രണ്‍ബീര്‍-ആലിയ വിവാഹത്തിനു ശേഷം ബോളിവുഡ് ഉറ്റു നോക്കുന്ന മറ്റൊരു താരവിവാഹമായിരിക്കും അതിയ ഷെട്ടി-കെ.എല്‍.രാഹുല്‍ വിവാഹം.
