കേരളത്തില് ഒരു സിനിമയ്ക്ക് ലഭിക്കുന്ന ഏറ്റവും വലിയ സ്ക്രീന് കൌണ്ട് ആണ് ലിയോയ്ക്ക് ലഭിച്ചിരിക്കുന്നത്. 655 സ്ക്രീനുകള്! ഇതുവരെ ഒന്നാം സ്ഥാനത്തുണ്ടായിരുന്ന മോഹന്ലാല് ചിത്രം മരക്കാറിനെ രണ്ടാം സ്ഥാനത്തേക്ക് തള്ളിക്കൊണ്ടാണ് ലിയോയുടെ നേട്ടം. ലിയോ എത്തുമ്പോള് അത് നിലവില് തിയറ്ററുകളിലുണ്ടായിരുന്ന മലയാള ചിത്രം കണ്ണൂര് സ്ക്വാഡിന്റെ മുന്നോട്ടു പോക്കിന് തടസം സൃഷ്ടിക്കുമോ എന്നത് സിനിമാ പ്രേമികള്ക്കിടയിലെ ഒരു ചര്ച്ചയായിരുന്നു. ഇപ്പോഴിതാ ഇതുമായി ബന്ധപ്പെട്ട് സംവിധായകന് ഒമര് ലുലുവിന്റെ സോഷ്യല് മീഡിയ പോസ്റ്റ് ശ്രദ്ധ നേടുകയാണ്. കണ്ണൂര് സ്ക്വാഡിന് വീണ്ടും തിയറ്റര് കൊടുക്കണമെന്ന് ഒമര് ലുലു അഭിപ്രായപ്പെടുന്നു. ലിയോ കണ്ടതിന് ശേഷമാണ് ഒമര് ഇങ്ങനെ ഒരു കുറിപ്പുമായി എത്തിയിരിക്കുന്നത്. ലിയോ കണ്ടു. ഒരു വണ് ടൈം വാച്ചബിള് സിനിമ. കണ്ണൂര് സ്ക്വാഡിന് വീണ്ടും തിയറ്റര് കൊടുക്കുക. ഇല്ലെങ്കില് മലയാള സിനിമയോട് തിയറ്റര് ഉടമകള് ചെയ്യുന്നത് അനീതിയാവും”, ഒമര് ലുലു കുറിച്ചു. അതേസമയം ലിയോ കണ്ണൂര് സ്ക്വാഡിന് ഭീഷണി സൃഷ്ടിക്കുന്നില്ലെന്ന് തിയറ്റര് ഉടമകള് മാദ്യമങ്ങളോട് നേരത്തെ പ്രതികരിച്ചിരുന്നു. ലിയോ വരുമ്പോള് കണ്ണൂര് സ്ക്വാഡിന് ഇപ്പോഴുള്ള തിയറ്ററുകളുടെ എണ്ണം സ്വാഭാവികമായും കുറയുമെന്നും എന്നാല് നാലാം വാരത്തിലേക്ക് കടക്കുന്ന ഒരു ചിത്രത്തിന് അത്രയും തിയറ്ററുകള് മതിയാവുമെന്നും തിയറ്റര് ഉടമയും ഫിലിം എക്സിബിറ്റേഴ്സ് ഫെഡറേഷന് പ്രസിഡന്റുമായ ലിബര്ട്ടി ബഷീര് മാദ്യമങ്ങളോട് പറഞ്ഞിരുന്നു. “ആ സമയത്ത് അത്രയും തിയറ്ററുകള് മതി എന്നതാണ് വാസ്തവം. റിലീസ് സമയത്ത് മള്ട്ടിപ്ലെക്സുകളില് മൂന്നും നാലും സ്ക്രീനുകളില് കളിച്ച ചിത്രത്തിന് ഇപ്പോള് ഒരു സ്ക്രീന് മതിയാവും. അത്രയും ആളേ ഉണ്ടാവൂ. പണ്ട് അറുപതും എഴുപതും തിയറ്ററുകളിലായിരുന്നു റിലീസ് എങ്കില് ഇന്ന് 250- 300 തിയറ്ററുകളിലാണ്. അപ്പോള് അത്രയും പ്രേക്ഷകര് സിനിമ കണ്ടുകഴിഞ്ഞു. മറ്റൊരു കാര്യം ഈ വാരം ലിയോ റിലീസ് ആയാലും കാണാന് പുതിയ മലയാള സിനിമയൊന്നും എത്തുന്നില്ല. അതിന്റെ ആനുകൂല്യം മമ്മൂട്ടിപ്പടത്തിന് കിട്ടും എന്നുമായിരുന്നു ലിബര്ട്ടി ബഷീറിന്റെ വാക്കുകള്. തെന്നിന്ത്യയിൽ റിലീസിന് മുന്നേ ഏറ്റവും ഹൈപ്പ് കിട്ടിയ ചിത്രങ്ങളിലൊന്നാണ് ‘ലിയോ’. കേരളത്തിൽ ഇതുവരെയുള്ള റിലീസ് റെക്കോർഡുകൾ തകർത്തെറിഞ്ഞ് 655 സ്ക്രീനുകളിലാണ് ലിയോ പ്രദർശനം ആരംഭിച്ചത്. പുലർച്ചെ നാലു മണിക്ക് ആരംഭിച്ച കേരളത്തിലെ പ്രദർശനത്തിനു മുൻപ് തന്നെ മിക്ക ജില്ലകളിലെയും തിയേറ്ററിനു മുന്നിൽ ആഘോഷപരിപാടികൾ അരങ്ങേറിയിരുന്നു. ആദ്യ ദിനത്തിൽ ഒട്ടുമിക്ക എല്ലാ ഷോകളും ഹൗസ്ഫുൾ ആയിരുന്നു. കേരളത്തിലെ പ്രീ സെയിൽസ് റെക്കോർഡുകൾ തകർത്തെറിഞ്ഞ ലിയോ പത്തു കൊടിയോളം രൂപയാണ് പ്രീ സെയിൽ സെയിൽ ബിസിനെസ്സിൽ സ്വന്തമാക്കിയത്. മലയാളി താരങ്ങളായ മാത്യൂസ്, മഡോണ സെബാസ്റ്റ്യൻ, ബാബു ആന്റണി എന്നിവരും ലിയോയിൽ അവരുടെ പ്രകടനം ഗംഭീരമാക്കി.
തിയേറ്റർ എക്സ്പീരിയൻസ് പൂർണമായി പ്രേക്ഷകന് സമ്മാനിക്കുന്ന ലോകേഷ് കനകരാജ് ചിത്രത്തിൽ വിജയ് യുടെ ഗംഭീര പ്രകടനവും അനിരുദ്ധിന്റെ മികവാർന്ന സംഗീതവും കാണാം.. 480 ഫാൻസ് ഷോകളാണ് ചിത്രത്തിന് കേരളത്തിൽ മാത്രം നടന്നത്. സഞ്ജയ് ദത്ത്, അർജുൻ സർജ, ഗൗതം മേനോൻ, മിഷ്കിൻ, മാത്യു തോമസ്, മൻസൂർ അലി ഖാൻ, പ്രിയ ആനന്ദ്, സാൻഡി, ജനനി, അഭിരാമി വെങ്കിടാചലം, ബാബു ആന്റണി തുടങ്ങിയ താരങ്ങളാണ് ചിത്രത്തിലുള്ളത്. സെവൻ സ്ക്രീൻ സ്റ്റുഡിയോ, ദി റൂട്ട് എന്നിവയുടെ ബാനറുകളിൽ ലളിത് കുമാറും ജഗദീഷ് പളനിസാമിയും ചേർന്നാണ് ലിയോ നിർമിക്കുന്നത്. ശ്രീ ഗോകുലം മൂവിസിന് വേണ്ടി ഗോകുലം ഗോപാലൻ ആണ് കേരളത്തിലെ വിതരണാവകാശം സ്വന്തമാക്കിയത്. ഡ്രീം ബിഗ് ഫിലിംസാണ് കേരളത്തിലെ ഡിസ്ട്രിബൂഷൻ പാർട്ട്നർ. ലിയോയുടെ ഡി.ഒ.പി : മനോജ് പരമഹംസ, ആക്ഷൻ : അൻപറിവ് , എഡിറ്റിങ് : ഫിലോമിൻ രാജ്, പി.ആർ.ഒ: പ്രതീഷ് ശേഖർ എന്നിവരാണ്
