വിഷു ദിനത്തിൽ അരുൺ രാജിന്റെ വ്യത്യസ്തമായ ഒരു ഫോട്ടോഷൂട്ട് ആണ് ഇപ്പൊ വൈറൽ ആകുന്നത് . സമകാലിക സംഭവങ്ങളെ കണ്സെപ്റ് ഫോട്ടോഷൂട്ടിലൂടെ അവതരിപ്പിച്ചു മുൻപും പ്രേക്ഷക ശ്രെധ നേടിയ ഫോട്ടോഗ്രാഫർ ആണ് അരുൺ രാജ് . സത്യഭാമ , ശരത് , മീനാക്ഷി എന്നിവരാണ് ഇതിൽ കഥാപാത്രങ്ങൾ ആയി എത്തുന്നത് . ഇതിനോടകം തന്നെ മികച്ച പ്രതികരണമാണ് അരുൺ ഫോട്ടോഷൂട്ടിനു ലഭിക്കുന്നത് .
”ഇതും ഒരുതരം മാറ്റി നിർത്തലാണ് . പുണ്യതയിൽ അവളിലെ ഏഴുദിവസം അശുദ്ധിയുടെ കറ ചാർത്തുമെന്നുള്ള മൂഢ വിശ്വാസം ഊട്ടിയുറപ്പിച്ചു തരം തിരിക്കുന്ന വേർതിരിവിന്റെ കുടിലതയാണ് . എഴുപത് പതിറ്റാണ്ടുകളായും മാറാതെ വേരൂന്നി നിന്ന് , അടുക്കളകളിൽ പോലും അവളെ നിഷിദ്ധയാക്കി പുറംതള്ളുന്ന അന്ധവിശ്വാസങ്ങളുടെ തുരുമ്പിച്ച ചങ്ങല വിലങ്ങുകൾ ആണ് . അല്ലെങ്കിൽ ഈരേഴുലോകം പോലും വായ്ക്കുള്ളിലാക്കിയ കണ്ണന് കളങ്കമാവുമെന്നും , തൂണിലും തുരുമ്പിലും പോലും സദാ വിളങ്ങുന്ന തേജസ്സിന് നിന്റെ ആർത്തവ രക്തത്തെ 7 ദിവസത്തേക്ക് തൊട്ടുകൂടാത്ത വിധം ഭയമാണെന്നു വരുത്തി തീർക്കുന്ന സമൂഹത്തിന്റെ മേൽക്കോയ്മയുടെ വക്രിച്ച ചിരിയുള്ള കുത്തങ്ങളാണ് .അതുമല്ലെങ്കിൽ സേവകന്മാരെന്നു സ്വയം വിശേഷിക്കപ്പെട്ട കിങ്കരന്മാരാൽ ഒരു പിഞ്ചുബാലിക ആദ്യം മാനത്തിനും പിന്നീട് ജീവനും നിലവിളിച്ചു കണ്ണീരുപൊടിച്ച് ജീവൻ വെടിഞ്ഞ നാലമ്പലങ്ങളുടെ വിശുദ്ധിയുടെ കെട്ടറകൾ പണ്ടേക്കു പണ്ടേ ദൈവങ്ങൾക്ക് മടുത്തിട്ടുണ്ടാകും. അതുകൊണ്ടു തന്നെയാകും സ്വപ്നങ്ങളിൽ മാത്രം പീലിനിവർത്തിയാടിയ മാധവൻ വിഷുക്കണിയായ് അവൾക്കുമുന്നിൽ ആദ്യമോടിയെത്തിയതും, അശുദ്ധിയായ് മുദ്രകുത്തപ്പെട്ട അതേ കടും ചുവപ്പു നിറമുള്ള മഞ്ചാടിക്കുരുക്കളായി അവൾക്കു മുകളിൽ പെയ്തിറങ്ങിയതും…” അരുൺ രാജ് ഫേസ്ബുക്കിൽ കുറിച്ചു .
